Lapataiga Mai Le Faletupe Tutotonu
Aumai lau $50 ae maua lau $200 i le 10 aso. E iai ni pisinisi faapea? E iai se Faletupe i totonu o Samoa e mafai ona faatinoina nei ituaiga pisinisi? E faapefea ona faatino nei ituaiga pisinisi?
Ua taulimaina nei e le Faletupe Tutotonu o Samoa lipoti ma tuuaiga i nisi o faiga poo polokalame tau tupe o lo o faagasolo i totonu o le atunuu e aofia ai faiga faameaalofa (gifting po’o le re-gifting), toe faafoi faameaalofa o tupe faatasi ai ma le faafaigaluegaina o tagata. E manatu le Faletupe Tutotonu e logoina le mamalu o le atunuu ina ia matua silasilia toto’a i nei faiga ina nei mea ane ua mafatia ai i le taimi mulimuli. E fautuaina e le Faletupe Tutotonu o Samoa le atunuu lautele ina ia aua nei auai pe teu faafaigaluega ni tupe i nei polokalame tau tupe ona o le a leiloa ma lē toe maua ai a outou tupe sa tou tautiga ma gapatia ai e galueaina.
O lo o vaavaai le Vaega e Faamaumauina Faamatalaga Tau Tupe Masalomia (Financial Intelligence Unit) a le Faletupe Tutotonu i nei faiga taufaasese i le taimi nei. O le taimi lava e mae’a ai nei vailiiliga, o le a tuuina atu ai loa i le Ofisa o Leoleo ma isi Matagaluega e fitoitonu iai mataupu nei mo le faia o suesuega ma moliaga talafeagai e faasaga ia i latou o lo o faatautaia nei polokalame poo faalauiloa.
E faamanatu atu foi i le mamalu o le atunuu o le Tafatolu o Faiga Tau Tupe Taufaasese (Pyramid Schemes) nei e faasāina i lalo o le vaega 65 o le Tulafono o Faiga Faatauvaga
o Fefaatauaiga ma le Puipuiga o Tagata e Faaaogaina Oloa ma Auaunaga 2016 lea e vaavaaia e le Matagaluega o Pisinisi, Alamanuia ma Leipa.
Vaega 65 o le Tulafono o Faiga Faatauvaga o Fefaatauaiga ma le Puipuiga o Tagata e Faaaogaina Oloa ma Auaunaga o loo faapea mai e solitulafono:-
1. se tagata e uunaia pe faagaoioia se polokalame mo le tuuina atu o oloa po o auaunaga mo ni taui, pe afai o le toatele o tagata auai i le polokalame, o le polokalame ua faavaeina ai se tulaga taua o se avanoa e faatau mai po o le faatau atu o se avanoa o tupe teufaafaigaluega, e tusa lava pe faia e le tagata lava ia po o e ala i se sooupu, i lo se avanoa e faatau mai pe tuuina atu oloa po o auaunaga; ma
2. o le polokalame e, pe e ono tulai mai e faaituau, i le toatele o tagata auai i le polokalame, e faapea ai –
(i) o taui tau tupe mo le toatele o na tagata auai, o lo o faalagolago i le
faafaigaluegaina o tagata auai faaopoopo (e tusa lava pe i se tulaga
tau soloaiga i vaega e maualalo atu pe leai foi;
(ii) le aofaiga o tagata auai faaopoopo i le polokalame, ia e tatau ona
faafaigaluegaina ina ia maua ai o taui tau tupe talafeagai, i tagata auai i le polokalame e le o mafai ona ausia po o e lē ono mafai ona ausia e le toatele o tagata auai.
O le isi veaga, e mafai foi ona molia se tasi e faatinoina ia gaioiga i lalo o le vaega 172 o le Tulafono o Soligatulafono 2013 i le mauaina mai e ala i se faiga tau faasese pe o le faapogai ai o le gau e ala i le tau faasese i soo se mea totino (e aofia ai ma tupe). Oi latou e faamaonia soligatulafono e mafai ona nofosala i le falepuipui e le i lalo ifo o le fitu (7) tausaga. O nei polokalame e matua maaleale lava ma e telē le aafiaga pe a fia teu faafaigaluega ai sau seleni.
Ua uma foi ona tuuina atu le faasilasilaga a le Faletupe Tutotonu i Faalapotopotoga Tau Tupe (Pisinisi Lafo Tupe ma Faletupe o Fefaatauaiga) e faasaina ai soo se tupe e lafo e masalomia e agai i polokalame nei ua taua o polokalame faameaalofa. E faafetaia ai foi e le Faletupe Tutotonu ia faalapotopotoga tau tupe nei mo le faailoa mai i le Faletupe Tutotonu o nei polokalame tau tupe o lo o faaseseina ai o tatou tagata.
E fautuina malosi e le Faletupe Tutotonu le mamalu o le atunuu, sei faamolemole ia mataala ma nofo uta i nei ituaiga polokalame tau tupe fai mai e te vave milionea ai ma tele ai lou tamaoaiga. O le fautuaga a le Tusi, o le ua iai le utaga mamao e iloa atu le mala ma lafi ai. Talitonnu le taofi ua tatou nonofo malamalama uma i nei vala eseese tau pisinisi ma ua iai foi lo tatou utaga mamao.
E faatosina loto lona foliga mai e teu faafaigaluega ai tupe ina ia televave ai ona maua au tupe e sili atu aemaise i lenei vaitau i le faigata o le faamai o le Koviti 19, aemaise lava pe a foliga mai e iai nisi na faamanuiaina i le amataga. E faapena lava le faasologa o nei faigapisinisi, e faaauiluma mai lava tagata na faamanuiaina, ae nana i tua le anoano o lo’o gau. Peitai a tosina gofie le tofa ma le faautaga ma ave iai lau tupe, ona e nofo sauni lea o le a goto i le vasaloloa ete le toe vaai iai ona maimau ai lea o lou afu liligi na e galue malosi ai ina ia maua le tupe aua le tausiga o lou aiga ma lau fanau. Ona toe tagi ane lea o Vi ua tietie i le vaa o Eneli!