Martha Taumata Faavae.
Maee Ualesi Siliva ose tasi o sui tamaitai tauva fou, ua maea ona resitalaina i le vaega faaupufai a le HRPP.
Na ia taua, ose lagona na avatu e lona afioaga o Vaipua mo ia, ina ia alu e tamoe i le tofi o le itumalo Salega 2.
Saunoa Maee, ose taimi muamua lenei ua sau ai e tauva, ma e ese foi ona lagona o ia ose tamaitai ina ua sau i totonu o lenei foi faalagamaea.
Na ia taua, o lona naunautaiga , ina ia faapea ona siitia le itu tau i le soifua maloloina i totonu o le afioaga, itumalo male atunuu atoa.
E ese le taua o le iai o tina i totonu o le palemene, aua e pei lava o totonu o aiga, e moni lava o tama e latou te faia tonu , ae o le mamafa lava o tina e latou te faatinoina le itu tau i le soifua maloloina, pei ole faamamaina o maota ma laoa ma soo se vaega .
O lou auai mai e avea ose sui tauva, ose tofiga na filifili mai, pe sa mananao ai foi lou nuu o Vaipua, ina ia tamoe i le tofi o le itumalo.
Oute taumafai lava ina ia faalogologo pea poo a nisi o vaega e manaomia ai e le afioaga male itumalo se fesoasoani.
Oute iloa, oloo ua taoto uma galuega faatino , oloo faagasolo e le malo ona fai, ma o le agaga lava ina ia pipii pea i le tulaga oloo iloa e mafai ona maua ai le fesoasoani male atinae alualu i luma o le afioaga , itumalo male atunuu.
O le avea ai o ia ose tasi o sui tamaitai e tauva, ose itu ua matuai sili ona taua ia te ia, ona e ese le taua o le iai ose aso o tina poo tamaitai i totonu ose vaega faaupufai .
Fautuaina ai foi nisi o tina, o avanoa le aumaua lenei, e mafai ona agai mai e latou te avea ai ma sui tauva, ina ia fesoasoani i le atinaega o le atunuu, aua le lumanai o nai alo ma fanau i le lumanai.
Taua e le sui o le nuu o Vaipua, Loli Tui, o le latou sui tauva, ose tamaitai tautua lelei ma tautua alofa i totonu o le nuu male ekalesia.
O le ala foi lea ua naunau ai lava le afioaga o Vaipua e aumai, ona ose tagata e ola tautua i le nuu male ekalesia, e toaga i fonotaga ma toaga e fai ana monotaga i le ekalesia male nuu.
O lea matou te iloa, le lelei tele o Maee, ona e faatuatuaina e le Matagaluega sa galue ai, faatuatuaina foi e le malo, e ala i tofiga sa galue ai.
O le matou afioaga nei, e matuai selau pasene le HRPP, matou te lagolagoina lava le faigamalo lea, ona ua tele faamanuiaga ua matou vaaia, i Savaii, o le matou itumalo, aemaise ai o nei suiga fou ua iai ua matagofie ma alualu ai luma le manaia o Samoa.
O le susuga ia Maee Ualesi Siliva, ua silia male 37 tausaga o galue i le itu tau soifua maloloina.
Ua 58 tausaga o le soifua.