18 Oketopa 2022
Lau Afioga i le Fofoga Fetalai, Palemia ma le Kapeneta faapea Sui Mamalu o le tatou Palemene.
Ua i luma o le Atua Soifua e fa’avae ai lo tatou Malo le taulaga na osia e Patele.
Lau Afioga i le Fofoga o le Fono faapei ona e ta’itaia ai lo tatou Maota i lenei taeao i le tatalo. Tatou te auai faatasi i le vi’iga ma le fa’afetai ae a le fa’amagaloga o tatou sese. E ao ai ona tatou tulivae i luma o le Atua fa’afofoga tatalo i aso uma o le tatou ola. Aua o le tatou lea natula o le sese.
‘Aua lava, ‘Aua lava ne’i i a’i tatou, ae ia i le Atua pea le vi’iga e tatau ai.
O se laolao lelei fo’i lenei e momoli ai le fa’afetai i le tapuaiga leleoa a le Ao Mamalu o le tatou Malo, lau Afioga i le Tuiaana.
Fa’amalo i lou vala’auina mo leisi paeaiga fou e ala i le musumusuga lilo i le Afioga i le Taitai o le Malo ma le Kapeneta.
Fa’afetai le galue – sagai ane ‘ai o le Tai, maua sou finagalo aua le tautuaina o le tatou Malo. Fa’amalo le Tauata’i.
Afifio le Sui Tofia faapea le Fa’amasino Sili. O Paia o Samoa i ona tulaga faalupelupe – aua Aiga ma latou Tama, Tulatoa o Aiga ma Faleupolu tofia faapea le Usoga a Tumua ma Pule e Ono i Salafai.
Page 2 of 52 O Paia ma Mamalu faalupelupe o tatou uso Tu’ofe ma le latou foi Faiga Malo ile la itu o le Vai – Tutuila ma Manu’a. Tulouna ia, Afio le Kovana ma lau Kapeneta, le Fa’amasino Sili, tainane le Peresetene ma Afioga i Senatoa o le Maota maualuga ae a le Fofoga Fetalai ma Sui Mamalu o le Maota o Sui.
O Paia lava ia fa’asino i le Falelima i Sasa’e ma le Falelima i Sisifo, le Nofo a Ma’opu ma Faatui ma To’oto’o.
I le tupu pea o le agaga fia saoloto o Malo o loo fa’afoefoe i faiga faa- kolone, e le tauiso le taua o le Faigamalo a Tutuila ma Manu’a i le saofaiga a Malo o le Pasefika i le lumana’i, o le a tula’i mai ai Samoa e lua.
E atili tu matila ai pea i le malaelae a tatou faiga Malo, e galulue so’oso’otauau. E lua ai o tatou leo e faatonufolau i tonufai o le Pasefika i upufai o Malo ole lalolagi.
O le agaga saili Malo lea na fa’ataoto mai e tatou Tuaa ua fai i lagi le latou folauga, ae lafo mai i a’i tatou e solisoli mulia’ao i taiala na taulamua ai tatou te fa’aauauina ma le lototele, I le agaga loto mau ma le filiga.
Faafetai i le faanonogamanu faifaipea a le Aufaigaluega Paia ale Atua. O outou sa ma faigata, o le a nu’unu’u atu faatini o Tausala. Lau Afioga i le Fofoga Fetalai, o leisi lenei taeao fou i tala faasolopito o le Palemene o Samoa.
Ua malama i ulugalu le faatofalaiga a Ali’i ma
Page 3 of 53 Tama’ita’i o le Faamasinoga ma le latou foi tiute fai o le faauigaina o Tulafono e pasia e le Fono Aoao lenei Faitulafono a lo tatou Malo Tutoatasi o Samoa.
E le toe agai i ai se upu. Faafetai i le Fofoga Fetalai i lana faaiuga ua mafua ai ona tatou laulua fesilafa’i i lenei taeao fou.
O le Fono Aoao Faitulafono lenei tatou te tau fai puipui i ai i lona mamalu, ma o se itu e le tusa ai le fuli e le Faamasinoga oni faaiuga mamalu a le Maota lenei.
A’o fea ea o le a sulufai i ai le Faipule mo se lavea’i?
O le tulaga le maalofia lena pe a la’aloa le silasila i Aia Tatau o lo’o faataua e le Fa’avae.
O le Tofa na aga’i i ai le Palemene e fa’asala ai ni Faipule ua ta’u matuaina i totonu o le Maota lenei, a lea ua tau le Ta.
Ua fa’alumalumaina i le faate’a fa’amo’amo’a fa’alemamalu ise piliota e leai se tapulaa. Ua matua fa’amativaina fo’i i le mea e oo i ai le malosi o le Malo ma o latou Sui i totonu o le Palemene lenei, i le umi e pei ona faaleo e le Taitaifono o le Komisi, “sei vaai pe sui le amio”. O se lafoga fa’atauemu ma le taufaifai.
Na o le olo lava o le fua ma inu le ipuvai o le onosa’i ma le loto fa’amagalo. Sa le’i mafai foi ona tali atu i ia faasalaga. E le oti faalua foi se isi.
O le a le o’o se upu i aia tatau fa’a sui Mamalu o le Maota lenei e faaleo sa’oloto ai o latou lagona e aunoa ma le faalavelaveina.
O le saolotoga lena faale- Tulafono Faavae o le Malo Tutoatasi o lo’o tatou laulauvivilu ai e malamalama ma manino i ai lau Afioga i le Fofoga Fetalai.
Fa’ai’u atu se lagona.
Afai ua le lava le lua (2) o sala ua mae’a ona faatino e fai ma ai o le finagalo faamaliegata o le na itu o le Maota, “Aua le poia faleolo”.
Talofa e, se ua gasea lau Afioga i le Fofoga Fetalai. E oso pea le la. E sau fo’i ao o nu’u. O se fe’au faatupu manatu, e taua tele ia te a’u a se tasi Faifeau i se Faigalotu a le Matagaluega o Faamasinoga, fai mai – Au tou Afioga i Fa’amasino, a tou saofafai loa i tou nofoali’i o le Faamasinoga o le a tolaulau sau tou faaiuga, ‘aua ‘aua lava nei fa’avaea ni faaiuga i le Alofa. E sese ai fa’aiuga. Fa’avae i le Faamasinoga tonu.
Ma e malamalama lelei lava le Faamasino i le ‘Iuga e tonu ma sa’o.
O le agaga foi lena o le fa’aolooloma’u ina ia tatou mulumulu ‘aufoe fa’atasi i le agaga o le avatu – aumai.
O upu masani o tatou Fonotaga i le Palemene lenei, e le milia faau’u upu o le Maota lenei, ae tumau lava aga fa’atamalii o le fe’oe’oea’i ma le feavata’i o Taitai o le atunu’u i totonu o le Palemene lenei. Ia f’aifo mai lagi manu mo Samoa- Nei ma Elua.
Soifua ma ia manuia.
Tuila’epa Sa’ilele Malielegaoi