31 Me 2022
Afioga Leota Laki Lamositele Sio
Minisita o Tina ma Tamaitai Atinae o Nuu ma Agafesootai
Maota o FMFMII
ELEELE FOU
Afioga e,
Mataupu: Tofiaina o Sui Auai o Komiti Fono Faa-Itumalo
O lea ua taulimaina lau tusi o le aso 12 Aperila 2022 e faatatau i le mataupu o taua i luga.
O loo faamamafa mai ai le taua o le amanaia o sui o le Vaega Faaupufai o le FAST i totonu o lenei Komiti. Ma e faapea mai ai, o le aotelega o lenei tusi o le silasila ma le faanaunautaiga a le Malo ia maua le avanoa tutusa mo tagata uma ma ia manuia le polokalame e pei ona tapenaina.
“Ma ona o lenei, ua iai ni tuutuuga ma aiaiga, e taiala le tofiga o Komiti Faaitumalo ia i lalo o Faipule a le HRPP ma e ao ona usitaia ma mulimulitaia iai tofiga o sui i le Itumalo lenei o Vaimauga I.
1. E tumau pea le Taitaifono o le Faipule i le Fono Faaitumalo
2. O le Sui Taitaifono o le sui sa lagolagoina le FAST o loo alala i totonu o le Itumalo.
3. O le Failautusi, e tofia iai se sui o le FAST e faamaonia e le Sui Taitaifono.
4. O sui e to’a 12 o loo totoe ai, e filifilia i luga a le maliega a le Taitaifono ma le Sui Taitaifono.
5. Ia faia se tusi e faailoa mai ai sui ma se maliega, ma sainia e le Taitaifono, Sui Taitaifono ma le Failautusi ile faatulagaga ua faailoa atu i luga. O lenei tusi e faatuatusi mai e faapea:
Ofisa Sili
Matagaluega o Tina ma Tamaitai
Vaega o le Polokalame mo le Atinae o Itumalo
Maota o Salamasina, Apia”
Mo lou silafia, ua maea ona resitalaina lo matou Komiti i lalo o le Tulafono o Sosaiete (Incorporated Societies) o loo faafoe e le MCIL. Ma ua faamalieina foi tuutuuga na tuuina mai e le MWCSD. Peitai ua faateia i matou ina ua toe aumai lau tusi ma au aiaiga fou e pei ona taua i luga.
E tusa ai la ma lau tusi, o lea sa feiloai ai nuu taitasi o la matou Itumalo. Mulimuli ane ona feiloai ai lea o le Itumalo atoa i le aso 6 Me 2022. Sa auai ma se tamalii e toatasi na ia faailoa lona lagolagoina o le FAST. O le faaiuga na tasi iai le finagalo o Alii ma Faipule o le Itumalo o Lepa, ia Fatialofa ma Auelua ma Tapaau o Lepa, e teena tuutuuga ma aiaiga (2) – (5) e pei ona faataatia mai i lau tusi ona o mafuaaga nei:
(i) O le a le faiā o le Vaimauga 1 (e tusa ma le palakalafa 4 o lau tusi) ma le Itumalo o Lepā? Matou te leiloa pe na e siakiina faaupuga o lau tusi ae e te lei sainia. Ma ua atagia mai ai le faataaloga i vai o le faatinoga o galuega. It’s an insult to the Lepā Constituency to be mixed up with Vaimauga 1 Constituency.
(ii) O le filifilia o le Sui Faipule o le Itumalo o Lepā, sa fili mai i le agavaa aua le manuia o nuu o le Itumalo ma Samoa atoa. E le i filifilia ona o se vaega faaupufai. E faapena foi pulega lelei o loo faatino i totonu o lenei Itumalo. E filifili mai lava e aiga tagata agavaa i suafa matai ma faamamalu i totonu o nuu. Ona faapena foi lea ona faamamalu e le Itumalo. E le filifilia e aiga matai e tausia aiga ma nuu i totonu o Lepā, e fua i se vaega faaupufai e latou te lagolagoina. E le o se agavaa lou lagolagoina o se vaega faaupufai i filifiliga a aiga mo ni a latou matai. E faapea foi i le filifiliga o Alii Pulenuu ma Sui Tamaitai o Nuu. E fua lava i le agavaa ae le o se Vaega Faaupufai. E faapea foi le filifilia o soo se Komiti poo se Soa-Komiti i totonu o lenei nuu ma le Itumalo. E fili lava i le tai sē agavaa.
(iii) O lou faapea mai e Sui Taitaifono ma Failautusi le sui o le FAST ao isi sui e 12 e filifili e le Taitaifono ma Sui o le FAST, ua e sosofa ai ma e fesiligia le faautautaga a Alii ma Faipule, ma e sosopo ai i le tulaga e le o iai le agavaa ma le silafia o le Malo i totonu o pulega a Alii ma Faipule aua le tausiga o le filemu. You are treading into the realms of decision making outside your competencies. O aiaiga nei o le a tula’i mai ai le vevesi i le va o Alii ma Faipule i totonu o afioaga ma alalafaga. Ae o le mea e sili ona matautia, o le amata mea mai o le Malo ma sui o le FAST i nei vesiga o le a iai.
(iv) O lea e te saunoa mai faapea “…o le silasila ma le faanaunautaiga o le faiga malo, ia maua le avanoa tutusa e tagata uma…” Ae afai o tuutuuga ia (2)-(5) lea e aumai, o fea la o iai le avanoa tutusa mo sui o le HRPP ma sui o isi vaega faaupufai ia sa tauva i le palota? E le sa’o la lau faaaliga faapea o avanoa tutusa mo tagata uma faatoa maua pe a faatino tuutuuga (2)-(5) e pei ona aumai i lau tusi. Mo lou silafia, o avanoa tutusa mo tagata uma e maua i pulega lelei mo le filifilia o sui mai lo latou agavaa. Ae le o le filifilia mai i le FAST.
(v) Talu ai o lau tusi o loo faaogaina le malosiaga faale-Malo e faatonu mai ai aiaiga e tatau ona savalia e lo matou Itumalo aua le manuia o le FAST, ae faaoga iai tupe a le au failafoga ma le atunuu, ua matou fesiligia ai le faatinoina o lou tiute faa-Minisita. O lea ua e faaogaina le malosiaga faale-Malo e u’unai mai ai le manuia o le FAST. You are using government mandate and resources to promote the best interests of FAST. Ae ana faapea lava o ni tupe nei o le a fuafua e fa’aaluina mo lenei polokalame, o ni tupe lava a le Vaega Faaupufai a le FAST latou, ua matou taliaina ma le agaga faafetai aiaiga ua tuuina mai. O polokalame nei e te saunoa mai ai i lona tapenaina o polokalame a le Malo, e iai foi le sao o le Itumalo o Lepa i tupe a le aufailafoga ma le atunuu lea tou te faaogaina mai i le polokalame lenei.
(vi) O le filifilia o sui o le Komiti a le Itumalo o Lepa, e filifili faatasi mai lava e Alii ma Faipule o nuu taitasi a latou sui. O loo iai i totonu i latou e lagolagoina soo se vaega faaupufai lava. E latou te filifili faatasi lava sui o le Komiti e fua i luga o le agavaa. Ae e le o se agavaa faapitoa lou lagolagoina o le FAST.
Talu ai ona matou te teena le filifili mai e le Malo o le Komiti a le Itumalo o Lepa, o lona uiga la, o le a le manuia le Itumalo o Lepa i le vaega tupe e pei ona folafola e le Taitaifono a le FAST, e tai miliona a le Itumalo i le tausaga mo le 5 tausaga, pe afai o le a usitaia aiaiga? O lona uiga ua taufaasese ma pelogia e le Taitaifono o le FAST le Itumalo o Lepa ma le atunuu.
O loo matou tuuina atu le video clip o le folafolaga a le Taitaifono a le FAST, Laauli Leuatea Schmidt, na fai e faatatau i le miliona e tuulima mai i Itumalo e fai ai lava mea e mananao iai. Ma o upu nei o le folafolaga a Laauli:
“O le a faavagavaga se tinoitupe e tasi le miliona mo le Itumalo e atinae ai le Itumalo. O nei faiga na umi se taimi o matou feliuliuai ai ma fefulisai. E aumai tonu le miliona tala lea e filitagaga iai le tofa ma le faautautaga i totonu o le Itumalo, poo a atinae toe te finagalo e ave iai le tou faamuamua. Tou te le faatali seiloga e fai mai le Malo o le a fai le auala galue faatoa fai. Tou te le faatali sei fai mai le Malo e fai le auala lea faatoa fai. O le a aumai le tino i tupe i o tou lima o lea tou te silafia le mea e faamuamua ma le mea e pito sili ona tou manaomia. E tasi le miliona i le tausaga. E 5 tausaga o le nofoaiga. E 5 miliona le tupe atoa mo le Itumalo. Ia e faapena le faasoa i itumalo uma lava o lo tatou atunuu. O ai foi ni Itumalo e le o lagolago mai i le tatou faamoemoe lenei, e tutusa lelei i le faatinoga o le faamoemoe lenei.”
Silasila la lau afioga i faaupuga na fai mai, e leai se mea o ta’u mai ai le aiaina e le Malo ma le FAST o sui o Komiti o Itumalo. O le folafolaga o le tino-i-tupe e $1 miliona tala e tuu sa’o i aao o le Itumalo. E le o se miliona faa-poloketi.
O le tali atu lea ma le agaga faaaloalo e tusa ma lou tusi mai. Tatou galulue faatasi aua le manuia o Samoa ma ona tagata.
Faafetai
Tuilaepa Fatialofa Auelua Sailele Malielegaoi
FAIPULE O LEPĀ/TAITAIFONO O LE KOMITI O FAA-ITUMALO
Kopi: Ofisa Sili, Matagaluega o Tina ma Tamaitai.