Talosaga a Lepa i le Palemene Mati 2023

I LE FONO AOAO FAITULAFONO A SAMOA

O le Talosaga Faamaualalo a Tagata Palota o le Itumalo Faleaganuu/Faapalota a Lepā i Atua, Samoa.

UA FAAALIA AI:

Talu ai o le umi ona faamalolo le tumau (suspension) o le sui Faipule a lo matou Itumalo o Lepā i le faaiuga muamua a le Palemene, faamamalu i le aso 24 Me 2022 ae leai se aso e muta ai; faapea ona toe faia le isi faaiuga a le Palamene e toe faamalolo le tumau ai pea le sui Faipule o Lepā mai i le Palemene, faamamalu i le aso 18 Oketopa 2022 ae faamuta i totonu o le 24 masina, ua leai ai nei se leo o lo matou Itumalo i totonu o le Palemene i le onosefululima pasene (65%) o le taimi o totoe o lenei paeaiga 2021-2026. E talitonu lenei Itumalo ua ogaoga ma umi nau’a le faasalaga o lenei Itumalo, ma e tatalo atu ma le agaga maualalo i le Palemene i sona finagalo malamalama mo le toe iloiloina o lenei faasalaga mo se taimi talafeagai ma fetaui, e pei foi o faaiuga o loo faatino i mataupu faapenei e isi Palemene i atunuu o le Taupulega a Peretainia, ina ia mafai ai ona iai so matou leo i talanoaga ma faaiuga e aafia ai le ola lelei o tagata palota ma tagatanuu o lenei itumalo, e le gata ia i latou o loo soifua mai nei ae maise latou e lei soifua mai.

O lenei talosaga na faaiugafonoina i le fono a le Itumalo i le aso Faraile 28 Oketopa 2022. Ma sa auai uma le paia o le Itumalo ia Faolotoi ma Maopu Taulagi, Puletiuatoa ma Falanaipupu faapea le aloalii ia Tupua ma le Sagapolutele, fetalaiga ia Fiu ma Utaulu. Faapea foi le Puaauli ia Sagale ma Sogimaletavai ma le fetalaiga a Lopa’u ma Falefata. Faapea foi le Susu a Alalamalae i le Lolofietele, le alo o le Tuiatua, Tuilaepa le alo o Malietoa ma Po’alaga le alo o Mataafa ma le fetalaiga ia Palea ma Olo. Faapea foi Tupuola, le matua ia Tago ma le Usoalii, o Lupesoliai, Savusa ma Faletagoai ma le fetalaiga a Popo ma Talimao. Faapea le alalata’i o Alii o le Itu a Lefao, Tulaniu o Atua, o Tama Punefu ia Fatialofa ma Auelua ma le matua o le Faleatua o Malielegaoi ma le mamalu o le Faleatua ma Salefao. E le gata i lea sa auai foi le mamalu o Faletua ma Tausi, Sa’oao ma Sa’o Tamaitai faapea le aumaga o le Itumalo. Ma autasi loa, e leai se isi na tetee, mo le faatinoina o lenei talosaga. O loo faamaonia lenei talosaga ia i latou o loo saini (e silia ma le 800) e lagolago lenei mataupu.

AAFIAGA I LUGA O TAGATANUU O LE ITUMALO O LEPA

1. O Samoa o le atunuu faa-temokarasi. O Sui o le Palemene e filifilia e tagatapalota o latou Itumalo ma avea ai nei ma Sui e fofogaina le finagalo o latou Itumalo i mataupu e faasino i le atunuu faapea tulafono e faatonutonu, pulea ma faafoe ai vaega uma o lenei soifuaga i Samoa.
2. E pei ona faailoa atu i luga, o le umi o le faasalaga e lua tuufaatasi, 30 masina, o le Sui Faipule a Lepā i le Palemene, ua taofia, noatia ma ua leai ai se leo o tagata palota atoa ma tagatanuu uma o Lepā i totonu o le Palemene i le tele o mataupu taua e talanoaina ae maise ni tulafono taufa’aofi ma tulafono tagofia e le Pelemene i le taimi ao faasala lo matou Sui Faipule. E taua tele le tiute o le Sui Faipule aua e aofia i latou i Komiti Faa-Palemene lea e mata’ituina(oversight role) le faatinoga o tiute ma galuega a le Malo (Executive). I lea tulaga, ua leai ai foi se leo o lenei Itumalo o Lepā i lenei tiute taua Faa-Palemene.
3. O le a leai se leo o lenei Itumalo e momoliina i le Palemene manaoga taua i tulaga tau atinae ae maise le soifua lelei o tagatanuu o lenei Itumalo, e tatalo atu ma faatauanau le Malo i se tamaoaiga mo le Itumalo o Lepā i faamanuiaga talafeagai ma le aiā mo avanoa tutusa e pei ona tuuina atu i isi Itumalo o Samoa.
4. O le ogaoga o lenei faasalaga umi ua le na o le Sui Faaipule o Lepā i le Palemene o aafia ai, ae ua aafia ai ma le aveesea fa’aituau toe le talafeagai o le leo o tagata palota ma tagatanuu uma o lenei Itumalo o loo saini atu i lenei Talosaga, faapea ma le toatele ma anoano o tagatanuu o Lepā o loo afifio ma pāpā’aao i atunuu eseese o le kelope.
5. O Samoa o le Sui o le Feagaiga Faavā-o-Malo i luga o aiā faavā o Tagata Soifua ma Mataupu Fa’aupufai o Malo (Signatory to the International Covenant on Civil and Political Rights (ICCPR). O lea e matou te tatalo atu ai i le Fono Faitulafono a Samoa faamolemole sei silasila ane i tiute ma faiga faavae ua tauto ma ioe (commit) iai Samoa i lenei Feagaiga Faava-o-Malo. E tele foi le sao ma le lagolago o loo maua mo le atina’e o Samoa, mai i atunuu o loo saini ma aloaia lenei Feagaiga.
6. O le vaega 25 (Article 25) o le ICCPR ( i lona faaliliuina faasamoa) o loo faapea mai:
   1. E tatau ona maua e tagatanuu uma aia ma avanoa tutusa…
      1. E auai ai i mataupu mo le lelei o tagata lautele i se faiga tuu sa’o pe o se sui na filifilia i se faiga tu’usaoloto.
      2. O lenei sui na filifilia i se faiga palota faavaitaimi i se faiga saoloto ma le aiā tutusa uma o tagata i faiga palota faalilolilo, ina ia faamautinoa ai le saoloto o le momoliina o manaoga o tagata palota.
      3. Ia mafai e le Sui Filifilia ona ia maua i tulaga lautele o avanoa tutusa, le auaunaga lautele mai lona atunuu. “
7. Ona o nei faasalaga umi, ua le mafai ai e lenei Itumalo ona auai i mataupu mo le lelei o tagata lautele e auala atu i lo matou sui na saoloto lona filifiliina e tusa ma le fuaitau talafeagai o le Vaega 25 o le Feagaiga ICCPR. O lo matou Sui filifilia ua iai le tomai ma le agavaa i manaoga taua ma le mo’omia o Lepā ae paga lea ua le lagona se leo ona o le umi naua o lenei faasalaga a le Palemene.
8. Talu ai le taua tele o le auai o le sui o lo matou Itumalo i totonu o le Palemene, ua matou talitonu ai ua ogaoga tele naua le vaitami o le faasalaga pe a fuafua ma faatusatusa atu i vaitaimi o faasalaga ona o mafuaaga talafeauga lelei ma le faasalaina o la matou Sui Faipule, faa-faaiuga na faia i ni sui o le Palemene a Peretania (United Kingdom). O se atunuu ua mausali sootaga va-lelei (established diplomatic relations) ma Samoa ae sili lona taua ona o le atunuu na afua mai ai tulafono (common law) o loo faaoga e Malo o le Taupulega ma Peretania (Commonwealth) e aofia ai ma Samoa.

E tusa ai ma la matou sailiiliga, e 43 sui usufono a le Palemene o Peretania na faasala(suspend) i totonu o le 73 tausaga amata mai le tausaga e 1949 e oo mai i le 2022. O le fua-faaogatotonu e lilifa iai le umi o nei faasalaga (average suspension penalty) e sefulutasi aso fono(11 sitting days).

Peita’i matou te fia faamamafaina atu le faasalaga na faia i le aso 13 Fepuari 2002 e faasaga i le Faipule o le Leipa, Palemene o Peretania, Keith Vaz na ia solia le Tulafono Tumau ona o ” Uiga le Migao” faasaga i le Palemene. (breaches of the code of conduct and contempt of the House). E na o le tasi(1) le masina o le faasalaga (one month suspension). Hansard Ref Vol 380 c 213-23

Upega Tafailagi : https:commonslibrary.parliment.uk/research-briefing/sn0230/

1. Matou te faaolooloma’au atu e tusa o tu ma aga faa-Matai o Samoa, aua o Samoa o le nuu tofi. Pe le tefā le tauala i se finagalo faatupu ma le faatamalii i le paia o Samoa i lana Palemene, o lea ua faatino le faasalaga ma noatia ai se leo o Lepā , ina ua faamamalu le faasalaga o lo matou leo i le aso 24 Me 2022 e tusa ma le ono masina talu ai. O lea lava ua tau le tā ma ua usitaia lava le finagalo o le Palemene. O tulaga masani o le aganuu e iai le au togisala ma i latou e vaesala. E le faatonuina e le leo o Lepā le paia o le Palemene a Samoa. E sa! Ae o le tatalo i le agaga e tumu i le faaaloalo ma le migao tele, o le a lafo atu i le faautautaga loloto ma le tofa paia a le Palemene o Samoa mo so outou finagalo malamalama.

TOE FAAMAUTUINA O LA MATOU TALOSAGA

E tusa ai ma molimau ua matou faailoa atu i luga, matou te tuuina atu i le agaga e tumu i le faaaloalo mo se finagalo malamalama i le mamalu o le Palemene ua ogaoga ma umi naua le faasalaga o le Itumalo o Lepā ma ua leai se leo o tagata palota ma tagatanuu uma o Lepā.

O la matou toe upu, ia alofagia e le Atua, ia mama le lagi i le Paia o le Palemene faapea le tapuaiga a le Ao Mamalu o le Malo. Ia manuia tele le Fono Usu a le Fono Aoao Faitulafono a Samoa. Ae o le a malolo atu le leo o Lepā.

Soifua ma ia Manuia.

Sainia e:

Alii ma Faipule o le Itumalo o Lepā

(O saini a tagata palota ma tagatanuu o Lepā (e silia ma le 800) o loo i le pepa faaopoopo o loo faapipii atu).