Ta’avale Minista ole Kapeneta i faitoto’a o le Maota o le Palemene i Tiafau
TUSI ILE FOFOGA FETALAI : (ui atu i le Failautusi ole Fono)
1. O ananafi na fai ai la’u fa’aiuga, e momoli atu le fa’afetai i lou tou manatu i se taavale mo le Taitai ole Itu Agai e pei fo’i ona matou amatamea ai.
Sa matou faia le iuga ile taimi ole Tautua Party, fa’atau loa ma le ta’avale fou momoli loa ia Palusalue sa avea ma taitai.
Leai lava ma ni aiaiga o le faaogaina. E le’i sue’a fo’i poo ai le Matagaluega e sau ai le tupe.
Faigofie uma mea ile matou taimi. E le pei ole taavale lenei e tau una’i solo se matagaluega e fa’atupea.
2. O lenei ua agai ile 2 tausaga talu ona fa’atau le taavale, ae o loo o’u i ai pea i le Palemene, ma tutu ai pea fa’atimu ma fa’ala ma pisi samia i fafo ane o le tou ofisa.
Lona uiga, ua second hand ai fo’i ma leaga ma ua pala ai ma isi totoga ole taavale.
Ole tulaga lea e aafia i taavale e tutu mo se taimi umi ae le faaogaina.
Talofae i mea totino a le malo ae faapea ona faatalale i ai.
3. Ua matau atu fo’i e pule outou ile tagata tou te tofia e ave i ai le taavale, pei ose lole nao na faalala mai lava, tau fai laga atu i ai tamaiti taufao.
O le ituaiga tofa lea, lea fo’i ua oo lava ile taavale o faaaliali ai pea uiga ia, sa ou le talitonu ole a o’o i ai le Palemene mamalu o Samoa, ae maise latou o Ta’ita’i ole Malo.
4. O ananafi na fai ai la’u faiuga e avatu sa’u fautuaga e ave le taavale e faatau, o se tupe e maua totogi ai ovataimi o foma’i ma tausi soifua.
E le moomia e a’u ma matou o faipule o le HRPP,, o taitai iloga o Samoa ni uiga mataga, palapala faapea, e pei e tou te taua’i mai ni lole, ona matou laga atu lea i ai e taufao ma mitimiti ma etoeto.
5. Afai o faiga ia tou te masani ai, o pea e fai tou faiga tau faavalea ia i latou ua tou masani e faavalea, ae e le mafai ona tou faavaleaina le HRPP.
E pei fo’i ona tou faavalea le Observer, e faasalalau ile vaiaso talu ai, ua uma ona tou faaoo mai le taavale ile Ta’ita’i o le Itu Agai.
O loo i ai lava si a’u taavale na fa’atau i nai a’u lava tupe, o lo’o o’u fealua’i ai. Ae le moomia e matou se taavale o loo i ai se agaga eleelea ma le tiapolo o loo nofonofo ai ile taavale.
Oute alofa tele i le afioga i le Fofoga Fetalai faapea le Ta’ita’i ole Maota le Kapeneta ma Faipule uma ole FAST i lau tou tofa loloto teumau.
Na aumai le taavale o loo fa’ala pea ile Maota ole Palemene e tau mai ile taimi na tusi ai le tusi aualofa lenei.
Soifua
Tuilaepa Sailele Malielegaoi
Leader o HRPP