Saunoaga Gatoloai Tilianamua Toomata Afamasaga
Ou te tula’i i le ava ma le migao i luma o lenei faapotopotoga, aua ua susu lau susuga i le faafeagai, ae o se ositualaga mo i tatou uma i lenei afiafi matagofie. Faafetai tele i manavaga paia ua tomatauina ai lenei afiafi, lou faamanatu mai o tamaitai foi na faia i le faatusa ma foliga o le Atua Silisili Ese, ae le na o alii.
Afifio le paia o tamalii, o matai ma taitai o le komiti faapitoa na saunia lenei faamoemoe e pei ona tatou potopoto ai i Tiafau nei. Afio lau afioga i le Palemia ma le mamalu o lau Kapeneta. Faauluuluga o Matagaluega a le Malo ma Faauluuluga o Faalapotopotoga Tumaoti ma le Au Fai Pisinisi.
O se afiafi ua nanamu i le sigano ma le laumaile ae a le mosooi, o le lagaali ma le asi aua ua pāpā’a’ao tausala, afifio le paia i saoao , augafaapae, ma tamasa , faletua ma tausi, tina lauao sinasina ma le mamalu o tamaitai mai tafa eseese o Samoa.
Faamua se tatou faapolo ma se tatou faasagi i le Tapaau i le Lagi, ua talia faautugatagi, ua taoto peau o le sami, moe foi ma matamatagi. Ua tuvana i figota, ae olioli livaliva , siva se’ese’e temeteme ina ua a’e nei ‘auomanū, tafea ‘auomala, e iai ona agi malu fisaga.
Ou te faafetai tele mo lenei valaauina mai le komiti o tapenaga o lenei faamoemoe – i le amanaiaina o so’u tagata vaivai ae maise se tautua le atoatoa I le uunaia o tamaitai Samoa uma ina ia avea ma taitai i soo se vala o le olaga ae maise ai foi le avea ma sui faipule i le palemene o si o tatou atunuu pele. E le o fai fua pe soona fai nei galuega, tamaitai e o Samoa. Ua manino i molimau a taitai iloga o le lalolagi le taua o sao o tamaitai i soo se tonu poo se faiuga fai mo tagata uma i se atunuu, itulagi poo faavaomalo. A liliu ane foi i la tatou aganuu ma agaifanua, e le taumateina le faaeaea o faiva o faaaloaloga a Samoa i ona tamaitai. O faiva ia e afua mai ai le feagaiga sā i le va o le tuagane ma le tuafafine mai aso anamuā. E faatumutumu i le agaga o le tuagane lona tuafafine, e tausi, ma puipui ma ave iai mea silisili, ae faapea ai foi ona tautua le tuafafine i lona tuagane i le faaaloalo ma le va tapuia e iloga i nafa e faatino mo le faaeaina o le aiga.
Ae ā lenei taimi? Ua moni ai le upu, ‘ua numi le fue ua nunu le to’au’. O le manatu o nisi- o mamalu o le feagaiga sā ua i ai uma lea i faafeagaiga taulagi. Atonu o le ala lea ua faatamala ai ma ua lapelapea ai faatofalaiga a nisi, ua soona sauaina ai tamaitai, ona ua faatuatuana’i i faiva o faaaloaloga mai anamuā i le va o alii ma tamaitai. Samoa e, o le faiva o faaaloaloga o le measina lea a Samoa e tatau ona putiputi ma puipui aua e na o Samoa lava e maua ai lenei measina taua. Le feagaiga sā lea i le va o le tuagane ma le tuafafine, e avea ai tama teine uma ma ioimata o tama tama, e faapelepele ai tama uma i o latou tuafafine. A pele ia te oe lou tuafafine , e tatau foi ona e faapelepele i lau paaga o le tuafafine o le isi alii. Ana silafia e alii uma lenei measina ailoga e iai ni sauaga e faasaga i tamaitai ma fanau teine i si o tatou atunuu?
“ O la’u molimau, e matuā leai lava se tapula’a o mea lelei e mafaia e tamaitai” O le saunoaga lea a le faauluuluga o le Faalapotopotoga a malo Aufaatasi mo Tamaitai (UN Women) ae o ia foi sa avea ma Peresetene o le atunuu o Chile, le tamaitai o Michelle Bachelet.
O se molimau mai le Failautusi Aoao o Malo Aufaatasi talu ai nei, le susuga ia Ban Ki-Moon sa ia saunoa ma faapea mai
“O atunuu ua ausia aia tutusa mo alii ma tamaitai, o atunuu foi ia ua maualuga tulaga o le tamaoaiga. O pisinisi e toatele tamaitai I komiti faafoe, e matua faatuputupulaia i se taimi vave, ia polofiti a nei kamupani. O maliega e faatupu ai le filemu e lotolotoi ai tamaitai, o ni maliega mautu ma le gafataulimaina.
O palemene foi e toatele ai sui tamaitai, e latou te talanoaina le lasi o mataupu mo tagata uma, e pei o le soifua maloloina, o aoaoga, o le tausiga lelei o tamaiti, atoa ai ma le faatautaia o tulafono e le faailoga tagata.”
A o tatou manatunatu loloto i nei molimau ona iloa ai lea,o loo lotolotoi i nei mafaufauga le nafa a tamaitai Samoa ua lausilafia uma e le mamalu lenei, faapea le atunuu atoa, o le nafa lea “o le pae ma le auli.” O le pae ma le auli e lua ona tafa. Muamua o le “pae” o le paepae lelei poo le faamalamalamaina lea o itu uma o se mataupu ona faasaga lea o suli tamaitai e faatino le tafa lona lua o le ‘auli’ poo le faaleleia o itu uma e maua ai le toafilemu ma le filemu o se mataupu. O se nafa ua molimau iai le talafaasolopito o tamaitai ta’uta’ua o le atunuu ma o le a ou fai ma faataitaiga tamaitai nei, O Nafanua, Sooaemalelagi ma Salamasina.
O Nafanua o le toa tamaitai mai Falealupo sa ona ia lagaina le toilalo i aso e tele o lona nuu sa faapologaina e le A’eaisasa’e ma le A’eaisisifo. Sa ona ia tau le taua ma faatoilaloina ai fili o lona nuu,a e sa ona ia usitaia le faatonuga a lona tama o Saveasi’uleo ina ia faauma lea taua I le pa o Fualaga , ma ia sua le tuli aua le alii o aiga. Ose taua sa logologoa ai Samoa atoa, ma sa ola le malo o Nafanua i Falealupo ma sa su’emalo iai le tele o tupu ma tamalii mai isi itu uma o Samoa. E umi le tala….
Ae ou te manatu o se mea taua na faia e Nafanua e faatino ai le nafa o tamaitai, o le pae ma le auli, o le talaaga lea o le mafuaga na ala ai ona maua e Nafanua papa e fa o le Tuiatua, Tuiaana, le Natoaitele ma le Tamasoalii
O Samoa anamua o se Samoa e vatau tele aemaise taua i finauga poo ai e faaee iai papa ia e fa (4)- i lea taimi ma lea taimi. Peitai, o Nafanua na ia paea ma tuufaatasi papa e fa na ala ai ona ia maua ma pulea le Tafaifa ma maua ai le toafilemu o Samoa mo aso e tele. O lea na ia faatonuina ai loa Auvaa ma le Tapuaiga a Leulumoega ina ia faaee papa i le tamaitai o Sooaemalelagi.
O Nafanua- E le gata i le toa i le loto ae faapea foi ona toa i le faatofalaiga, le faatofalaiga lea na ia saunoa ai ia Malietoa ma Su’a ina ua suemalo atu ma faapea atu ai, “ Talofa Malietoa, ua e susu mai ua te’a atu le ao o le malo, ma le uso o malo, ua toe o le i’u o malo lenei e totoe. E ui i lea ae o le a avatu le iuomalo e te susu ma oe ae ia tali I lagi se ao o lou malo. Le mafuaga lea o le talitonuga o Samoa, na filemu ai le taunuuga mai o le tala Lelei a Iesu Keriso i Samoa ma iloa ai e Malietoa Vainuupo o le Ao lea o lona malo sa valoia e Nafanua.
Toe foi le faamatalaga ia Sooaemalelagi. O le tamaitai na manatu Nafanua e faaee iai papa e 4 o le Tafaifa peitai, sa ia faafetaia le sāvali a Auvaa ma le Tapuaiga mo le amanaiaina o ia ae o lona manatu, ua matua o ia, ma e tatau ona faaee le Tafaifa i lana tama o Salamasina— O le pae ma le auli, ua le manatu i sona faamatietiega ae ua manatu i le gafataulimaina o le tofi i tupulaga o i luā.
E pei ona silafia – o le gafa lea o Salamasina na sosolo mai ai pea le Tafaifa seia oo mai ia Fonoti le tupu ma Malietoa Vainuupo, o le na taliaina le Talalelei ua faakerisianoina uma ai Samoa.
Ioe, o gafa o tamaitai, ma lo latou nafa tau’ave, o le pa ma le auli, e faatoafilemuina soo se faigata.
Atonu ua manino i lenei folasaga le tāua o lenei nafa, pae ma auli, o se nafa mo taitai lelei. E le o se nafa e mafai ona tauaveina e soo se tasi e le o iai mealofa nei a le Atua, e pei ona fetalai le aposetolo o Paulo i le ekalesia i Kolose, mataupu 3 f 12 “O lenei ia oofu outou i le alofa mutimutivale ma le agalelei, o le loto maulalo ma le agamalu o le onosai ma le loto faamagalo – faapei o e ua filifilia e le Atua, o e ua paia ma ua alofaina.” Ioe, tamaitai Samoa o la tou nafa lena ‘o pae ma auli’ O nafa o ta’ita’i. O ta’ita’i e faatinoina le ‘pae ma auli’ o ta’ita’i lelei.
Maliega Faavaomalo
Ona ou oo mai ai lea i maliega faavaomalo ua ave iai le lagolagosua ma le faatauaina e le Malo o Samoa.
O le tausaga e 2012, na faalauiloaina ai se maliega autasi a le Taupulega o taitai o atunuu o le Pasefika ua iai Samoa, (Pacific Islands Forum leaders) ua ta’ua o le, “ Tautalaga i Aia Tutusa”. Ua tautino ai e taitai o le Pasefika o le a o latou , “taitaiina , matauina ma uunaia ia aia tutusa a tagata uma i tulaga e pito sili ona maualuga.”
O loo iai foi le maliega faavaomalo ua taua o le Maliega faia I Beijing, mo Faatinoga” o loo uunaia ai sui uma o Malo Aufaatasi e iai ma Samoa ina ia o ‘latou faatino auala uma e mafai ai e tamaitai ona maua le malosiaga e auai ai ma lotolotoi i le faiga o faaiuga i soo se mea.
O se tasi o maliega e taua tele mo le uunaia o tamaitai e auai I faiga faaupufai o Malo- O Tesema 19, 2011 na talia aloaia ai e le Fono Tele a Malo Aufaatasi le Maliega i le Auai i Upufai o Malo o tamaitai. O lenei maliega , ua matua faamamafaina le aveesea poo le faaitiitia o pa puipuia e le mafai ai e tamaitai ona auai i vaega faaupufai poo le avea ma faipule o se tamaitai i se palemene.
Ua valaauina ai Malo uma ua avea ma sui o Malo Aufaatasi ina ia faia loa ma faatinoina :
- Ia toe iloiloina auala e faatino ai faiga palota ma aveesea pa puipuia mo le auai o tamaitai.
- Ia uunaia vaega faaupufai e tafiesea pa puipuia e faailogatagata ma faafaigata ai tamaitai ona avea ma sui o vaega faaupufai. Ia faapea foi ona faia faavae ma aiaiga e fesoasoani i le avea o tamaitai ma sui o vaega faaupufai ae maise ai le avea o i latou o ni taitai iloga i totonu o ia vaega.
Ua silafia e le Pasefika atoa, o le malo o Samoa na uluai sainia le CEDAW i le Pasefika i le tausaga e 1992 poo le feagaiga lea e tetee atu ai i uiga faailoga tagata i tamaitai. Ua toetoe ina ausia le 30 tausaga talu ona o tatou sainia lenei feagaiga. Peitai ane e oo mai lava i le aso, o loo tula’i mai pea amioga ma lafoga i tamaitai e feteenai ma lenei Feagaiga, e pei ona iai le auga o lenei afiafi. O loo tele pea le galuega e tatau ona o tatou faia ina ia maua le tulaga tutusa ma alii i tafa uma o le olaga.
E lotolotoi i nei maliega faavaomalo ma ona faatinoga ia le feavata’i ma le va fealoaloa’i o alii ma tamaitai, poo se faalapotopotoga, poo se kamupani poo se ekalesia poo se palemene. O nisi foi o atunuu ua matua faamautuina lava i aiaiga tusitusia e faailoa ai amioga e le talafeagai I le va o alii ma tamaitai ae maise amioga e ono faatino ai le faasoesa ma le faasoesa i feusuaiga.
O le tausaga e 2019 na pasia ai e le Fono Faavaomalo a le Faalapotopotoga mo Tagata Faigaluega (International Labour Organisation) ia se Feagaiga Faavaomalo ua ta’ua o le “Feagaiga e Tetee atu ai i amioga faasoesa ma le faasoesa I feusuaiga, I totonu o nofoaga e faatautaia ai galuega .” (Convention for the Elimination of Harassment and Sexual Harassment in the Workplace.) O se feagaiga taua mo Samoa ma o loo tapenaina nei e le Fono Faatafatolu a Samoa (Samoa National Tripartite Forum) ia sauniuniga e tuuina atu i le Palemene o Samoa mo le sainia o lenei Feagaiga.
O se feagaiga o le a faamautuina ai ina ia malamalama ma a’oa’oina tagata uma I amioga faasoesa, e le talafeagai ma e faasaina,- e iai lafoga mataga i upu ma gagana, o gaoioiga ma faatinoga e aofia ai ma le soona faaaoga o le malosiaga ona o tulaga maualuga poo tofiga i fale faigaluega, o faalapotopotoga, o kamupani, matagaluega ma soo se siosiomaga e iai foi ma le palemene. Ioe, tamaitai e o Samoa o loo gaogaosa pea ma tele luitau mo le ausia o tulaga tutusa o alii ma tamaitai i Samoa ina ia faamautuina ai le faatamaliiaga o tamaitai Samoa uma. O loo tele pea la tatou galuega e tatau ona faia mo le tetee atu i sauaga i tamaitai i totonu o Samoa. Ae faapefea ona fai? Ia faasinoala le agaga o le Atua, ae le o mea vaivai ma le maulalo.
O le fautuaga a Paulo? Kolose m 4 f 6 “ Ia le aunoa au tou upu ma le alofa. Ia faamāi i le masima. Ia iloa e outou ona fai se tali i tagata e taitoatasi uma lava.” “
“Let your conversation be always full of grace, seasoned with salt, so that you may know how to answer everyone.”
E au le inailau a tamaitai. Ia manuia tamaitai uma o Samoa. Ia viia pea le Atua!
Soifua.