Afioga Fiame Naomi Mataafa, Tamaita’i Palemia o Samoa
Aso Toonai, 06 Me, 2023 Malumalu Mulivai, Apia
Ou te faatulou atu.
E matagofie nauā aao o e aumaia le Talalelei, o e naunau i le filemu, ma faailoa mai le olataga, ma o latou ta’utino le pule aoao a le Atua.
Afai e pulunaunauina lo tatou soifua auauna, e mafua ona o le Atua.
Ua maea foi ona tu’u matāmaga e le Atua o tatou aso i le fogaeleele nei.
O le molimau a le Tusi o Failauga, o le aso e fanau ai, ma le aso e oti ai.
O le aso e fiafia ai, ma le aso e faanoanoa ai. Ona faamaugagana lea e le faitau a Samoa ‘e tautala aso’, ma e iloga aso.
O le asō, e ui ina ua o tatou feiloai i le fusialo ma le faavauvau, ona o le valaau paia a le Atua i lana auauna, le afioga i le Akiepikopō, e molimau aso o lana auaunaga, ma e manatua pea.
Ou te faafetai tele mo lenei laolao, ua tuuina mai e faaleoina ai le faafetai a le tatou Malo i le soifua auauna o le afioga i le Akiepikopō Alapati Lui Mataeliga.
O le Ekalesia Katoliko, ua 178 tausaga talu ona toai taunuu i Malaeola ma Gafoaga, ma amata ai le galuega a le Atua i Samoa. Ua iloga le Ekalesia i le atinaeina o le faatuatuaga i Samoa, ma le tapueina o le soifua tapuai o tagata lotu uma o le faatuatuaga Katoliko.
E le gata i le laugaina o le Upu Mamana a le Atua, ae faapea foi i le apelepeleina o itutino tetele o le Ekalesia, e ala i le galuega faaositaulaga, galuega a Tamaitai Sā, galuega Faamonike, galuega a Felela, tausiga o Matagaluega i Nuu ma Afioaga, tapueina o tupulaga talavou, faapea le uunaia o aoaoga mo le poto salalau.
O ia galuega uma, e tele lo latou sao, i le atinaeina o le atunuu, ma o le itu matagofie, o loo faaauau pea e o’o mai nei.
O le lagisoifua lea e atagia ai taitaiga lelei, aua e mafua ona maopopo le galuega a le Atua, ona e filigā Taitai e saili i le Atua mo lana faasinomaga.
E mafua foi ona soifua fiafia tagata o le Ekalesia, aua e atagia i ona Taitai le alofa e ta’ui ai tigā, ma lu’itau o le ola nei, ae tū maualuga le maelegā e āputiputi agaga mo le Malo o le Atua.
Talu mai Novema o le 2002, ina ua pale mai le afioga i le Akiepikopō i le taitaiga o le Ekalesia Katoliko Aoao i Samoa, sa tele lana lagolago i galuega ma polokalame a le tatou Malo.
E le gata i faamoemoe tetele aloaia a le Malo, ae faapea foi i lona sao i le uunaia o le soifua tatalo o le Ekalesia, ina ia i ai le filemu, ma le tausiga alofa a le Atua i a Samoa.
Ina ua feagai si o tatou atunuu ma faafitauli i le maea ai o lana faiga filifiliga i a Aperila 2021, e lē galo le tulai mai o le afioga i le Akiepikopō e fesoasoani e saili faatasi se vaifofō.
O ana saunoaga tu’usao i lena vaitau, na o’oo’o i loto le feau taumolimoli. E le’i ‘alo lona finagalo, e toe faamanatu i le atunuu ma ona taitai lo tatou saolotoga na saili ma loimata, ma masa’a ai le toto o o tatou tuaā ua tofafā mai tiasā, nei vale tu’ulima.
Atoa ai ma lona naunau, ia soifua saoloto pea le atunuu, ma sisi faatasi le fu’a o le manumalo o Keriso, ina ua mafai lava e Samoa ona fofo ona gasegase-a-malo.
Ua a nei? a lea ua to’a filemū le atunuu, ua mavae atu na fatia. A o taitai e tulai mai i taimi e agi faali’ali’a ai le sulu, ma souā ai le folauga, e lē galo, ma e fai pea ma vaaiga, ma faataitaiga mo nei ma le lumanai.
E mafai ai ona faapea, o le afioga i le Akiepikopō, o le toa o le Talalelei, ma sa ia tulai fa’apuluvaga mo si o tatou atunuu ma le Malo, i ituaso faigata sa o tatou asa mai ai ona o vesiga i upufai o malo.
Talofa e, e maua gatā taitai sailimalō, e saili gatā le tōfā e faumau i le alofa, ae ta’ui i le finagalo faasino o le Atua.
Afai e i ai, o i latou ia o fetu pupula e faatonufolau i le folauga ma asaga faigata.
Ou te talitonu o meaalofa ia a le Atua, sa foaiina i lana auauna ia Alapati, ma sa ia faaaoga lelei.
Ou te faamauina ai le faafetai a le tatou Malo, i le auaunaga faaositaulaga a le afioga i le Akiepikopō. Ua autausagā lana tautua i le Malo o le Atua.
Ou te faafetai i lona sao taua e ala i le lagolago a le Ekalesia Katoliko, i atinae o loo taulamua ai lo tatou Malo, mai lava i lona faatoā pale mai i le tofiga.
O lona sao i le tuitui pea o le lagi, ina ia tatala punāvai o faamanuiaga a le Atua mo Samoa, e manatua pea.
Tau ia ina ia mulimuli atu ana galuega lelei uma ia te ia.
O lea ua malaga le Alii Faifeau, a o lea e loma le fonotele a le Ekalesia o le a faia mai i Samoa i le masina lenei, sa ia ta’imua ai, ma naunau e talimalō ai si o tatou atunuu.
Talosia le faamoemoe o le Ekalesia, ia faataunuuina ma le manuia.
Le paia o le Ekalesia i ona tulaga tofi faapea tagata lotu uma, ia tatou lototetele auā ua uma ona fetalai Iesu ‘o ia o le Toetu ma le Ola’.
O lona toetu, na ia faaumatia ai le malosi ma le matuitui o le oti ma le tuugamau.
O le mea lea, tatou te faafetaia le Atua i le soifua ofoina atu o lana auauna nei.
Tatou te faafetai foi le Atua, i le tele o nei tausaga, sa o tatou galulue ai ma molimauina meaalofa a le Atua mo Mataeiliga.