Susuga Tuilaepa Sailele Malielegaoi
Taitai Ole Itu Agai E Puipuia Aia Tatau A Tagata – HRPP
OUTE MUAI FAATULOU ILE AFIO OLE TATOU ALII FAAOLA ILE TAPENAKURO. AFIO LAU AFIOGA ILE TAITAI OLE SAUNIGA MA LE ITUAIGA SĀ TAINANE MAMALU FAALE MALŌ, FAALE EKALESIA, FAALE ATUNUU
O LA’U MOLIMAU E FAAPITO AUGAFA I TULAGA FAALE EKALESIA.
OLE MOLIMAU ALE MALO O FAIGA FAAVAE MASANI IA E MOMOLI AI LE FAAFETAI ALE PALEMIA E FAI MA SUI ALE AO MAMALU OLE MALO, LE SUI TOFIA, FAAPEA LE TAFATOLU FEFAATAUAGAI OLE TATOU MALO O SAMOA I FAAULULUGA O EKALESIA UA TUUA LE MALO AO LOO AVEA PEA MA TAITAI OSE EKALESIA – ILE TELĒ O LE LATOU FOI SAO TĀUA, ILE FAATALALELEIINA OLE LAFU MAMOE ALE ALII, I LALO OLE LATOU FOI VAAIGA E FANAU MAI AI ILE LATOU FOI GALUEGA FAIFAI PEA, NI TAITAI UA LAVA TAOSO ILE OLAINA O AOAOGA A LO TATOU ALII E FAAAUTŪ ILE ALOFA ILE ATUA, ALOFA FOI I USO A TAGATA
OLE AUAI LA OLE MALO, TATALA MA LE TAGAVAI E UFI AI LE SĀ OLE AO OLE EKALESIA KATOLIKO I SAMOA NEI, AE FAAFEAO E ALII OLE MALU OLE MALO, UA MAPUE ATILI AI MAMALU SAUSAUGATA O TOE SAUNIGA OLE FALELAUASIGA OLE AFIOGA IĀ AKIEPIKOPO MATAELIGA.
O SAAFIAFIGA FOI ALE APOSETOLO ILE FAAALIGA NAI PATAMO, IAI LATOU UA VALAAU IAI LE ALII, O “LATOU GALUEGA FOI E MULIMULI IA TEI LATOU”.
E LE TAU TOE MOLIMAUINA LA LE SOIFUA GALUE OLE AFIOGA IA MATAELIGA.
PEITA’I OSE TOE AVANOA LENEI O SAAFIAFIGA TATOU TE AUALOFA MA FAAMAVAE ATU AI ILE TATOU TA’ITA’I FAALEAGAGA UA MOTUSIA LE TATOU MAFUTAGA.
ILE FAATOA TOFIA AI O MATAELIGA E AVEA MA AKIEPIKOPO, SA IA VALAAU MAI IA TE A’U OU TE TAITAIFONO ILE KOMITI O TUPE.
O INĀ NA OU MOLIMAUINA AI NISI UIGA TĀUA OLE AKIEPIKOPO, OLE TAITAI E FIAFIA TELE E ATIA’E NOFOAGA TETELE MO SAUNIGA ALE EKALESIA.
POO LE IAI POO LE LEAI ONI SELENI AE SA FAALAGOLAGO TASI ALAPATI I AFIOGA A IESU, “OLE FAATUATUA E UNA’IA AI MAUGA TETELE.”
OUTE MATUĀ FAA’AMUIA ILE AKIEPIKOPO OLE A SUI TULAGA, E LĒ TOE POPOLE I NISI MAU ATINA’E, O LEA UA UMA ONA TAPENA E MATAELIGA AE AGAI TASI LOA IA E PUIPUI LONA SOIFUA MALOLOINA.
OLE NAUNAU GALUE FOI MA LĒ LAVA LE MALOLŌ E FAAVAVEINA ATU AI LAVA MA LE SOIFUA AE LEI LAVA LE SAO MO LE FAASAO O AGAGA E FAATOATELE AI LE AUAIGA OLE ATUA ILE OLA E FAAVAVAU.
OSE LESONA LELEI MO TATOU UMA
O ALAPATI, I ONA FOLIGA MA SI ONA LEO MALŪ, TAU LE LAGONA OSE TAITAI E AGAMALŪ MA LOTO MAULALO, A’O TUA ATU O FOLIGA NA, O LOO TA’UI AI LE LOTOMAU, LĒ MALUELUE INA UA TALITONU OLE MEA LEA E TATAU ONA FAI.
O ISI SUIGA TETELE TĀUA FAAOPOOPO MO LE EKALESIA KATOLIKO I SAMOA I LA’U MATAU NA FAATINO ILE NOFOAIGA A ALAPATI
(1) OLE AMATALIA LEA OLE TV E FAAMALAMALAMA AI I TAGATA KATOLIKO LE LOLOTO O MATAUPU SILISILI FAA LE TAPUAIGA KATOLIKO E TELE INA FAITAU ESEESE AI MA ISI FOI EKALESIA KERISIANO.
(2) ILE TAU FO’IA OLE UTIUTI O FAIFEAU KATOLIKO ONA O TAIALA E LĒ FAITOALUA LE AU OSI TAULAGA INA IA LĒ LUALUAGIA LE LATOU GALUEGA IA TUU ATOA AI LO LATOU OLA ILE ATUA, MA O LEA UA MAFAI AI ELE AU FAIGALUEGA I ALII FESOASOANI ONA TOE AOOGA FAA TIAKONO, PE Ā MALILIU LATOU TOALUA, E MAFAI AI LOA ONA FAAUU MA AVEA MA PATELE E LĒ TOE TOSINA GOFIE AI I TU’INANAU FAALELALOLAGI UA FOI MAI AI.
NA’O KASIANO LEAUPEPE NA TALEPEA LE TULAFONO UA TOE ALU LANA FAALUA.
(3) OLE FAATOATELE O MATAGALUEGA FAAOPOOPO E PEI O MATOU I SIUSEGA, E FEOLOLO AI FAIGA TAULAGA. TASI LE AULOTU AE UA FAA MATAGALUEGA
(4) OLE FAALELEIA O MUSIKA I SAUNIGA. OLE TAPUAIGA KATOLIKO E TELE INA PESE TATALO, MA FAA TATALO FOI PESE.
(5) OLE FAATU FAA VIKALIATU OLE PULEAGA UPOLU MA SAVAII, SA NAO LE TASI A LE FONO ALE PULEAGA. A’O LEA UA 7 NEI MAFUTAGA FAA VIKALIATU ILE AGAGA OLE FAAMAOPOOPO O TAULAGA.
MASANI ONA MĀ ASIASI MA TIALAVEA SEIGAFO HUNT MATOU TE EVA MA LE AKIEPIKOPO.
A MA FAAMAVAE ONA TAUANAU LEA O MĀ’UA MA TE TOE ASIASI ATU E MAUA AI LANA ATA.
MA TE TOE O ATU I ISI TAIMI UA FAA LĒ ATAATA LE MA TAMA, PEI FAATOA TE’A MAI AI ISI FOI AU FAAFIAFIA.
E LEI UMI ONA OU TAITAIFONO ILE KOMITI O TUPE AE OU TOE FAAMAVAE. INA UA TUSI FAAMAMA’I FAAFETAI MAI MATAELIGA UA TUMU ILE FIAFIA I NAI A’U FOI TUUALALO TĀUA, E LE FAIGOFIE ONA FAATINO, AE A OU FIA FAAMAVAE, OLE TAIMI LEA UA LAVA MA TOTOE LO’U SAO.
TELE ISI MAU MEA TUTUPU TATOU TE OFO LE MALAMALAMA AI. E PEI OLE TAUANE ESE TAMAITA’I TALAVOU OLE ALO ILE FAIFEAU EFKS, MA SE ALII TALAVOU KATOLIKO O JAMES COLLINS, O FAAILOGA O TIGĀ OLE TATOU ALII. OLE STIGMATA NA MUA’I TAUANE E PAULO E PEI ONA IA AUMAI ILE TUSI ILE EKALESIA I KALATIA O LOO TUTUPU AI PEA FESILI ILE FEAU O LOO TAU MOLIMOLI MAI AI. E LE TUPU FUA MEA FAAPENA
E PELE TELE ILE TATOU ALII ANA OSITAULAGA. O LATOU UA FAAUUINA E FOLAFOLA LE TALA LELEI, MA LATOU FAAE’EINA SAKALAMETA. O LATOU FOI O ISI TAGATA OLA, E IAI FOI O LATOU VAIVAIGA FAALETAGATA. O A NI O LATOU FAALETONU LAFO PEA IA TE IA NATE FAIA LE LATOU TAUI, AE IA TATOU AGALELEI IA TATOU OSITAULAGA. O A FAALETONU, FAAMAGALO, AUA NEI GOTO LE LA O ITA PEA.
ALAPATI, MANUIA LAU MALAGA