FESOASOANI MO LE TOE FAALELEIA O PISINISI MA AUAUNAGA
MO TAPENAGA O LE FONO A FAAULUULULGA O MALO TAUPULEGA (CHOGM) VALAAU MO TALOSAGA
TAIALA MO LE FESOASOANI A LE MALO O SAMOA
1. Autu ole fesoasoani
O le faamoemoe lenei a le Malo, o se fesoasoani faanonogatupe e faamatuu atu ina ia toe faaleleia pisinisi ma auaunaga e gafataulima ai le tali atu I le taligamalo o le fonotaga o faauluuluga o atunuu o le taupulega (CHOGM) ia Oketopa 2024.O le naunautaiga o le malo, ia lava tapena auaunaga ma pisinisi eseese ao alo atu Samoa e talimalo I le fonotaga.E tatala aloaia ai le ‘valaau mo talosaga’ mo pisinisi e faamalieina aiaiga o lenei fesoasoani a le Malo. O le tau aofai ole nonogatupe e agavaa ai se pisinisi e $100,000. O le numera o pisinisi o le a faatino ai le fesoasoani muamua e 30.
2. Aiaiga ma agavaa ole fesoaosani
O lenei fesoasoani a le Malo e agavaa iai pisinisi uma e ono faaogaina a latou auaunaga mo le taligamalo. E tatau ona faamatala manino lelei auaunaga o loo mafai ona tuuina atu e lau pisinisi e taua ma faaaogaina I le taligamalo.
Aiaiga e tatau ona faamalieina e se pisinisi ina ia agavaa ai ile fesoasoani :
(i) O loo lesitala le pisinisi I le Matagaluega o Tiute ma Tupe Maua;
(ii) O le pisinisi e puleaina e tagatanuu Samoa;
(iii) Pisinisi ua faamaonia e lelei faamaumauga ile totogiina o nonogatupe ile Faletupe o Atinae ma isi faletupe;
(iv) Faamatalaga e atagia ma faamautinoa mai ai le naunautaiga e toe faaola ma faaleleia le pisinisi e siitia ai tupe maua mo le gafataulimaina o le pisinisi ma le totogiina ole nonogatupe;
(v) Ia iai se saofaga (equity) a le pisinisi ile tau aofai o galuega e toe faalelei ma siitia ai le tulaga ole pisinisi (cash or in-kind];
(vi) Isi faamatalaga/aiaiga e moomia e le Faletupe o Atinae e tusa ai ma faiga faavae o nonogatupe.
- Manaoga o faapisinisi e mafai ona agavaa ile fesoasoani Faatauina o meatotino e faaleleia ai le pisinisi
– Galuega moomia e toe faalelei ai fale ma isi meatotino
– Isi manaoga e faamaonia e le Faletupe o Atinae
– E tatau ona tuuina mai faamatalaga e faamanino ai le faaogaina ile fesoasoani - Tuuina mai o talosaga mo le fesoasoani
O pepa o talosaga mo le fesoasoani o le mafai ona taulimaina ile Ofisa ole Faletupe o Atinae e pei ona tuuina atu.
Mo Upolu, faafesootai mai Afoa Aiufi Kelekolio ile telefoni 22861 ext 211 poo le imeli aiufis@dbsamoa.ws ma Goretti Fau ile telefoni 22861 ext 207 poo le imeli gorettif@dbsamoa.ws ile Ofisa Tutotonu ole Faletupe i Savalalo.
O talosaga mo le fesoasoani ia tuuina mai ile:
Pule Sili
Faletupe o Atinae o Samoa Savalalo
APIA
O le a tapunia le taulimaina o talosaga ile Aso Faraile, 22 Setema 2023 ile itula e 4.00pm.
Mo le silafia e le aufaipisinisi, o talosaga e taulimaina ae lei faamalieina vaega moomia o le’a le iloiloina.
Faafetai
PULEGA